នាព្រឹកថ្ងៃសៅរ៍ ទី២៤ ខែមិថុនា ឆ្នាំ២០២៣ ឯកឧត្តម បណ្ឌិត ពេជ សោភ័ន រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការប្រចាំការ ក្រសួងការងារ និងបណ្ដុះបណ្ដាលវិជ្ជាជីវៈ និងជាសហប្រធានក្រុមការងាររាជរដ្ឋាភិបាលចុះមូលដ្ឋានស្រុកព្រៃកប្បាស និង ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ បានអញ្ជើញសម្ពោធដាក់ឱ្យប្រើប្រាស់ជាផ្លូវការ អាគារមណ្ឌលសុខភាពចារ ស្ថិតនៅភូមិស្វាយចេក ឃុំចារ ស្រុកព្រៃកប្បាស ខេត្តតាកែវ។
ពិធីនេះក៏មានការអញ្ជើញចូលរួម ពី ឯកឧត្តម លោកជំទាវ ប្រតិភូអមដំណើរ លោក អ៉ិត សារ ប្រធានក្រុមប្រឹក្សាស្រុក លោក ឌឹម គឹមសាន អភិបាលស្រុកព្រៃកប្បាស កងកម្លាំងប្រដាប់អាវុធទាំងបី មន្ត្រីចំណុះរដ្ឋបាលស្រុក និងបងប្អូនប្រជាពលរដ្ឋចូលរួមជាង ៤០០នាក់។
មានប្រសាសន៍សំណេះសំណាលនៃឱកាសនោះដែរ ឯកឧត្តមបណ្ឌិត ពេជ សោភ័ន បានថ្លែងការកោតសរសើរ ចំពោះក្រុមការងាររាជរដ្ឋាភិបាលចុះជួយឃុំចារ បានយកចិត្តទុកដាក់លើវិស័យសុខាភិបាល សម្រាប់បងប្អូនប្រជាពលរដ្ឋ និងខិតខំប្រឹងប្រែងស្វែងរកថវិកាមកជួយកសាង មណ្ឌលសុខភាពនៅឃុំចារ និងបានគូសបញ្ជាក់អំពីការ បំពេញការងាររបស់រាជរដ្ឋាភិបាលជូនប្រទេសជាតិ មាតុភូមិ ក្រោមការដឹកនាំដ៏ឈ្លាសវៃរបស់សម្ដេចតេជោនាយករដ្ឋមន្ត្រី ដែលបាននាំមកនូវការបង្រួបបង្រួមជាតិ បង្រួបបង្រួមទឹកដី ក្រោមដំបូលរដ្ឋធម្មនុញ្ញតែមួយ ព្រះមហាក្សត្រតែមួយ និងរាជរដ្ឋាភិបាលតែមួយ៕
