នៅព្រឹកថ្ងៃពុធ ទី០៨ ខែវិច្ឆិកា ឆ្នាំ២០២៣ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ អញ្ជើញជួបសំណេះសំណាលជាមួយក្រុមកីឡាករទូក ង “អធិរាជឥន្ទ្រីសែនជ័យបារមីភ្នំស្វាយ” ដែលជាទូក របស់បញ្ជាការដ្ឋានកងរាជអាវុធហត្ថខេត្តបន្ទាយមានជ័យ ត្រៀមចូលរួមប្រណាំងនៅដងស្ទឹងសិរីសោភ័ណ ក្រោយបរិវេណសាកលវិទ្យាល័យជាតិមានជ័យ ស្ថិតនៅភូមិបាណយ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ដែលនឹងប្រព្រឹត្តទៅនៅថ្ងៃទី១១-១២ ខែវិច្ឆិកា ឆ្នាំ២០២៣នេះ និងត្រៀមទៅចូលរួមអបអរសារទរពិធីបុណ្យអុំទូកនៅទន្លវ៉ៃគោ ខេត្តស្វាយរៀង នាថ្ងៃទី១៨-១៩ ខែវិច្ឆិកា ឆ្នាំ២០២៣ នាពេលខាងមុខ។
នៅក្នុងឱកាសនោះដែរលោកឧត្តមសេនីយ៍ត្រី បោន ប៊ិន ក៏បានធ្វើការផ្ដាំផ្ញើដល់កីឡាករទូក ង ទាំងអស់ ត្រូវខិតខំប្រឹងប្រែងឱ្យអស់ពីលទ្ធភាព ដើម្បីដណ្តើមយកជ័យលាភី ជូនដល់អង្គភាព ជាពិសេសសុំឱ្យកីឡាករទាំងអស់មុនពេលប្រណាំងទូក ត្រូវថែរក្សាសុខភាពឱ្យបានល្អតាមរយៈការហូបស្អាត ផឹកស្អាត ប្រកបដោយអនាម័យ ចៀសវាងនូវការបរិភោគនៅអាហារដែលប៉ះពាល់ដល់សុខភាព ជាពិសេសការពិសារគ្រឿងស្រវឹងជាដេីម។
បន្ទាប់ពីបញ្ចប់ការសំណេះសំណាលលោកឧត្តមសេនីយ៍ត្រី បោន ប៊ិន ក៏បានឧបត្ថម្ភនូវសម្ភាររួមមាន អង្ករ១៤ការ៉ុង (៣៥០គីឡូក្រាម),ខោអាវកីឡា១០៦ឈុត, មួក៣៧, ត្រីខ៣កេស,ទឹកផ្លែឈេី៥កេស, ទឹកសុទ្ធ៥០យួរ,ទឹកត្រី៣យួរ, ទឹកស៊ីអ៉ីវ៣យួរ ក្នុងនោះលោកឧត្ដមសេនីយ៍ត្រី ក៏បានឧបត្ថម្ភថវិកាចំនួន៦លាន៥០ម៉ឺនរៀល ដល់កីឡាករទូក ដេីម្បីប្រេីប្រាស់ការចំណាយប្រចាំថ្ងៃក្នុងរយៈពេល២ថ្ងៃ ដែលត្រូវប្រណាំងនៅដងស្ទឹងសិរីសោភ័ណ ក្រោយបរិវេណសាកលវិទ្យាល័យជាតិមានជ័យផងដែរ៕
