នារសៀល ថ្ងៃពុធ ១០កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២២ ខែវិច្ឆិកា ឆ្នាំ២០២៣ នេះឯកឧត្តម គង់ សោភ័ណ្ឌ អភិបាល នៃគណ:អភិបាលខេត្តកណ្ដាល បានអញ្ជើញចូលរួមក្នុងកិច្ចប្រជុំផ្សព្វផ្សាយផែនការការពារ ព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ឧបនាយករដ្ឋមន្ត្រី ស្ថិតនៅទីស្ដីការក្រសួងមហាផ្ទៃ។
សូមជម្រាបជូនថា នៅឆ្នាំ២០២៣នេះ រដ្ឋបាលខេត្តកណ្ដាល មានទូកសរុបចំនួន ១០១ទូក ក្នុងនោះមាន៖ទូកង ចំនួន ៥០ទូក, ទូកមួងចំនួន ១៥ទូក និងទូកខ្នាតអន្តរជាតិចំនួន ៣៦ទូក ដែលមានកម្លាំងអុំចំណុះទូក សរុបចំនួន ៥,១៤២នាក់, កម្លាំងត្រៀមចំនួន ៩៣៨នាក់ ហើយកម្លាំង សរុបមានចំនួន៦,០៨០នាក់ ក្នុងផែនពិសេសចំនួន២២ទូក ត្រូវចូលរួមក្នុងព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ដែលនឹងប្រព្រឹត្តទៅនៅថ្ងៃទី២៦-២៧-២៨ ខែវិច្ឆិកា ឆ្នាំ២០២៣ នៅមុខព្រះបរមរាជវាំង រាជធានីភ្នំពេញ៕
