នៅទីស្តីការក្រសួង នារសៀលថ្ងៃព្រហស្បតិ៍ ៥កើត ខែផល្គុន ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៤ ខែមីនា ឆ្នាំ២០២៤ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប បានអញ្ជើញដឹកនាំកិច្ចប្រជុំសមាសភាពអាជ្ញាធរទន្លេសាបលើកដំបូង ស្តីពីការពង្រឹងយន្តការថែរក្សា ការពារ និងគ្រប់គ្រងធនធានធម្មជាតិ និងដែនព្រៃលិចទឹក ក្នុងខេត្តទាំង៦ ជុំវិញបឹងទន្លេសាប។
សូមជម្រាបថា កិច្ចប្រជុំនេះមានការចូលរួមពី ឯកឧត្តម លោកជំទាវ លោក លោកស្រីដែលជាអនុប្រធាន អនុប្រធានអចិន្ត្រៃយ៍ អគ្គលេខាធិការនិងសមាជិកនៃសមាសភាពជាក់ស្តែងរបស់អាជ្ញាធរទន្លេសាប ប្រធានមន្ទីរធនធានទឹក និងឧតុនិយមខេត្តពាក់ព័ន្ធ តំណាងក្រសួងស្ថាប័នពាក់ព័ន្ធ និងអាជ្ញាធរខេត្តទាំង៨ នៅជុំវិញតំបន់ទន្លេសាប។
ឯកឧត្តមរដ្ឋមន្ត្រីបានលើកឡើងថា បឹងទន្លេសាបគឺជាបឹងទឹកសាបធំជាងគេនៅក្នុងតំបន់អាស៊ីអាគ្នេយ៍និងជាបេះដូងនៃប្រទេសកម្ពុជាដែលមានតម្លៃមិនអាចកាត់ថ្លៃបាន ក្នុងពេលដែលផលិតភាពធនធានជលផល ប្រព័ន្ធអេកូឡូស៊ី និងប្រព័ន្ធចលនាចរន្តទឹកជំនន់តំបន់ទន្លេសាបបានជំរុញឱ្យមានការអភិវឌ្ឍសេដ្ឋកិច្ចសង្គមជាបន្តបន្ទាប់ ជាពិសេសប្រព័ន្ធតំបន់វាលទំនាបលិចទឹកជុំវិញតំបន់ទន្លេសាបជាប្រភពបង្កបង្កើតនូវជីវៈចម្រុះគ្រប់ប្រភេទ ធនធានជលផល និងរបរកសិកម្ម ដែលជាមូលដ្ឋានសំខាន់នៃសន្តិសុខស្បៀង និងទ្រទ្រង់ជីវភាពរស់នៅរបស់ប្រជាជនកម្ពុជារាប់លាននាក់។
ឯកឧត្តមរដ្ឋមន្ត្រីបញ្ជាក់ថា រាជរដ្ឋាភិបាលកម្ពុជា ក្នុងអាណត្តិទី៧ ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក៏ដូចជាអាណត្តិកន្លងមក ក្រោមការដឹកនាំរបស់សម្តេចតេជោ អតីតនាយករដ្ឋមន្ត្រី នៃព្រះរាជាណាចក្រកម្ពុជា ជានិច្ចកាលតែងតែផ្តល់អនុសាសន៍ និងដាក់ចេញនូវវិធានការក្នុងការថែរក្សា ការពារ អភិរក្ស និងអភិវឌ្ឍន៍បឹងទន្លេសាប ដែលជាសម្បត្តិធម្មជាតិដ៏មានតម្លៃសម្រាប់ប្រទេសកម្ពុជា។
ជាមួយគ្នានេះដែរ ឯកឧត្តមរដ្ឋមន្ត្រីជឿជាក់ថា កិច្ចប្រជុំនាពេលនេះនឹងប្រមូលបានគំនិតយោបល់ល្អៗបន្ថែមទៀត ដើម្បីជាធាតុចូលដ៏សំខាន់ ក្នុងការកែលម្អរាល់ដំណើរការការងារឱ្យបានកាន់តែប្រសើរឡើង និងបន្តពង្រឹងនូវកិច្ចសហប្រតិបត្តិការយ៉ាងល្អ ក្នុងការអនុវត្តកិច្ចការចំពោះមុខលើកិច្ចការពារ ថែរក្សា និងគ្រប់គ្រងតំបន់បឹងទន្លេសាបប្រកបដោយចីរភាព ចូលរួមចំណែកលើកកម្ពស់ការអនុវត្តគោលនយោបាយយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ដើម្បី កំណើន ការងារ សមធម៌ ប្រសិទ្ធភាព ចីរភាព កសាងមូលដ្ឋានគ្រឹះឆ្ពោះទៅសម្រេចបានចក្ខុវិស័យកម្ពុជាឆ្នាំ២០៥០។
គួររម្លឹកថា អាជ្ញាធរទន្លេសាប ជាអង្គភាពថ្នាក់ជាតិដែលមានភារកិច្ចសិក្សាស្រាវជ្រាវ និងសម្របសម្រួលក្នុងការគ្រប់គ្រង អភិរក្ស និងអភិវឌ្ឍន៍តំបន់ទន្លេសាបឱ្យមានប្រសិទ្ធភាព ដើម្បីធានាបាននូវផលប្រយោជន៍ប្រកបដោយនិរន្តរភាព។ អាជ្ញាធរអាងទន្លេសាប បានបង្កើតឡើងក្នុងឆ្នាំ២០០៧ ស្ថិតក្រោមទីស្តីការគណៈរដ្ឋមន្ត្រី និងបានប្តូរឈ្មោះជាអាជ្ញាធរទន្លេសាបវិញក្នុងឆ្នាំ២០០៩ ស្ថិតក្រោមក្រសួងធនធានទឹក និងឧតុនិយម ដោយបានដើរតួនាទីជាសេនាធិការឱ្យរាជរដ្ឋាភិបាល ដែលមានអាណត្តិការងារក្នុងការសម្របសម្រួលដល់ការគ្រប់គ្រង អភិរក្ស និងអភិវឌ្ឍន៍តំបន់ទន្លេសាប។ ជាមួយដំណើរការអនុវត្តការងារ អាជ្ញាធរទន្លេសាបក៏មានសមាសភាពជាក់ស្តែងមកពីតាមបណ្តាក្រសួងស្ថាប័ននានា និងខេត្តជាប់បឹងទន្លេសាបមួយចំនួនផងដែរ៕
