នៅព្រឹកថ្ងៃចន្ទ ១៥ រោច ខែផល្គុន ឆ្នាំថោះបញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៨ ខែមេសា ឆ្នាំ២០២៤ ប្រតិភូស្នងការដ្ឋាននគរបាលខេត្តតាកែវ ដឹកនាំដោយលោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ បានទទួលស្វាគមន៍ប្រតិភូនគរបាលខេត្តអានយ៉ាង ដឹកនាំដោយលោកវរសេនីយ៍ឯក ឡឹម ភឿកង្វៀង នាយកមន្ទីរនគរបាលខេត្តអានយ៉ាង ដែលបានអញ្ជើញមកជួបសំណេះសំណាលសួរសុខទុក្ខ និងជូនពរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស.២៥៦៨ គ.ស.២០២៤។
ក្នុងឱកាសនោះ ប្រធានប្រតិភូទាំងពីរខេត្ត បានសន្យា និងរួមដៃគ្នាបន្តអនុវត្តទិសដៅការងារដូចខាងក្រោម ៖ ១. បន្តសហការយ៉ាងជិតស្និទ្ធលើកិច្ចការពារសន្តិសុខ សណ្តាប់ធ្នាប់នៅតាមតំបន់ព្រំដែន នៃខេត្តទាំងពីរ (តាកែវ-អានយ៉ាង) ២. បន្តពង្រឹងទំនាក់ទំនងសាមគ្គីភាព មិត្តភាពជាប្រពៃ និងកិច្ចសហប្រតិបត្តិការល្អជាមួយគ្នា ។ ៣. បន្តសហការបង្ក្រាប និងទប់ស្កាត់បទល្មើសឆ្លងដែនគ្រប់ប្រភេទ ដូចជាៈ លួចឆ្លងដែលខុសច្បាស់ ព្រហ្មទណ្ឌ គ្រឿងញៀន ជួញដូរមនុស្ស និងអាវុធជាដើម…។ ៤. សហការបង្កលក្ខណៈងាយស្រួលដល់ប្រជាជនទាំងសងខាង ក្នុងការចេញ-ចូលប្រកបរបររកស៊ី ព្យាបាលជំងឺ និងទេសចរណ៍។ ៥. បន្តថែរក្សាព្រំដែន ជាព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍន៍នៅតាមតំបន់ព្រំដែននៃខេត្តទាំងពីរ។ ជាទីបញ្ចប់ លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ បានថ្លែងអំណរគុណយ៉ាងជ្រាលជ្រៅជូនចំពោះលោកវរសេនីយ៍ឯក ឡឹម ភឿកង្វៀង នាយកមន្ទីរនគរបាលខេត្តអានយ៉ាង និងប្រតិភូអមដំណេីរ ដែលបានឆ្លៀតពេលវេលាដ៏មានតម្លៃអញ្ជើញមកជួបសំណេះសំណាល សួរសុខទុក្ខ និងជូនពរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស.២៥៦៨ គ.ស.២០២៤ ជូនដល់ថ្នាក់ដឹកនាំ កងកម្លាំងនៃស្នងការដ្ឋាននគរបាលខេត្តតាកែវ នាពេលនេះផងដែរ។
