នាព្រឹកថ្ងៃព្រសហ្បតិ៍ទី៧ខែវិច្ឆិកាឆ្នាំ២០២៤នេះ ឯកឧត្តម វ៉ី សំណាង អភិបាល នៃគណៈអភិបាល ខេត្តតាកែវ បានដឹកនាំមន្រ្តីជំនាញពាក់ព័ន្ធ និងអាជ្ញាធរក្រុងដូនកែវ ចុះពិនិត្យបរិវេណជុំវិញបឹងតាកែវ ដើម្បីធ្វើការសិក្សាកែលម្អរ ត្រៀមរៀបចំពិធីបុណ្យទន្លេ ដែលរដ្ឋបាលខេត្តនឹងរៀបចំនៅអំឡុងខែមីនា ឆ្នាំ២០២៥ ។
ឯកឧត្តម វ៉ី សំណាង អភិបាលខេត្ត ក៏បានធ្វើការណែនាំទៅដល់អាជ្ញាធរក្រុងដូនកែវ និងរដ្ឋបាលព្រៃឈើខេត្ត និងអង្គភាពជំនាញពាក់ព័ន្ធទាំងអស់ ត្រូវសហការគ្នា ស្ថាបនាការអភិវឌ្ឍលើការដាំកូនឈើប្រភេទកូនឈើទាលឱ្យបានច្រើនឡើងថែមទៀតនៅតាមបណ្តោយច្រាំងពីខាងកើតមាត់បឹងតាកែវ ពិសេសគឺសម្អាតផ្ទៃបឹងតាកែវ ឱ្យកាន់តែស្អាត ពោល គឺត្រប់ស្មៅ ត្រគៀតចេញឱ្យអស់ពីផ្ទៃបឹង ហើយធ្វើយ៉ាងណាត្រូវតែទប់ទឹកបឹងតាកែវ នេះកុំឱ្យរីង ហើយក៏ដើម្បីបង្កើនសោភ័ណ្ឌភាពក្រុង ទាក់ទាញភ្ញៀវទេសចរណ៍ជាតិ អន្តរជាតិ អោយចូលមកលេងកម្សាន្តកាន់តែច្រើនឡើងនៅក្រុងដូនកែវ ដែលជាមជ្ឍមណ្ឌលពាណិជ្ជកម្មដ៏មានសារៈសំខាន់មួយរបស់ ខេត្តតាកែវ ។
សូមបញ្ជាក់ថា ពិធីបុណ្យទន្លេ គឺដើម្បីជំរុញលើកតម្លៃ និងផ្សព្វផ្សាយសក្តានុពលទេសចរណ៍ខេត្តនានា តាមដងទន្លេ ជាពិសេស លើកទឹកចិត្តដល់ប្រជាជន នៅតាមបណ្តាខេត្តទាំងនោះ ឱ្យចូលរួមយ៉ាងសកម្ម ក្នុងការអភិវឌ្ឍទីក្រុងជាប់ដងទន្លេ ការងារអភិវឌ្ឍទេសចរណ៍សហគមន៍ ៕
