នៅព្រឹកថ្ងៃសៅរិ៍ ៦រោច ខែពិសាខ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២១ ខែឧសភា ឆ្នាំ២០២២ ឯកឧត្តម ឃួង ស្រេង សមាជិកកណ្តាលគណៈកម្មាធិការគណបក្សកម្ពុជា និងជាប្រធានគណៈកម្មាធិការគណបក្សរាជធានីភ្នំពេញ និងលោកជំទាវ ជា សុីណា ឃួងស្រេង បានដឹកនាំសមាជិក សមាជិកថ្នាក់រាជធានីភ្នំពេញ និងខណ្ឌព្រែកព្នៅ ប្រមាណជាង៤ពាន់នាក់ ដេីម្បីចូលរួមយុទ្ធនាការឃោសនាបោះឆ្នោត ក្រុមប្រឹក្សាសង្កាត់ អាណត្តិទី៥ ចាប់ផ្តេីមពីចំណុចបុរីភូមិសំរោង សង្កាត់សំរោង ខណ្ឌព្រែកព្នៅ រហូតទាំង៥សង្កាត់។
ថ្លែងក្នុងពិធីបេីកយុទ្ធនាការឃោសនាបោះឆ្នោតជ្រេីសរេីស ក្រុមប្រឹក្សាឃុំ-សង្កាត់ អាណត្តិទី៥នេះឯកឧត្តម បានមានប្រសាសន៍ថា សន្តិភាព ស្ថិរភាព និងរាល់សមិទ្ធផលដែលយើងសម្រេចបាននាពេលបច្ចុប្បន្ននេះ គឺបានមកពីការយកអាយុជីវិតធ្វើជាដើមទុន របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ព្រមទាំងបានធ្វើពលីកម្មដ៏ធំធេង និងមានការចូលរួមមិនអាចកាត់ថ្លៃបានរបស់បងប្អូនយុទ្ធជន យុទ្ធនារី ជនរួមជាតិយើងរាប់លាននាក់ដើម្បីជាតិ មាតុភូមិ ។
ឯកឧត្តមបានបញ្ជាក់ទៀតថា ជោគជ័យនៃការអនុវត្តនយោបាយឈ្នះឈ្នះរបស់ សម្ដេចអគ្គមហាសេនាបតី តេជោ ហ៊ុន សែន ប្រធានគណបក្សប្រជាជនកម្ពុជា បានធ្វើឱ្យពួកប្រល័យពូជសាសន៍ ប៉ុល ពត ត្រូវបានដួលរលំទាំងស្រុង ទាំងអង្គការចាត់តាំងនយោបាយ ទាំងអង្គការចាត់តាំងយោធាធ្វើឲ្យប្រទេសជាតិទាំងមូលទទួលបាននូវសន្តិភាពពេញលេញ មានឯកភាពជាតិទាំងស្រុងចាប់តាំងពីចុងឆ្នាំ១៩៩៨មក ។
ឯកឧត្តមបានអំពាវនាវដល់ពលរដ្ឋទាំងអស់បន្តខិតខំការពារថែរក្សាសន្តិភាព និងសមិទ្ធផលដ៏ថ្លៃថ្លាដែលបានមកដោយលំបាក ក្រោមការដឹកនាំរបស់គណបក្សប្រជាជនកម្ពុជា ឱ្យបានគង់វង្សជារៀងរហូត ដោយមិនអនុញ្ញាតឱ្យមជ្ឈដ្ឋានណាមួយមកបំផ្លាញទៅវិញបានឡើយ ។
ឯកឧត្តមឃួង ស្រេង សមាជិកកណ្តាលគណៈកម្មាធិការគណបក្សកម្ពុជា និងជាប្រធានគណៈកម្មាធិការគណបក្សរាជធានីភ្នំពេញបានបន្តអំពាវនាវដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោត សូមទៅចូលរួមបោះឆ្នោតជ្រេីសរេីស ក្រុមប្រឹក្សាឃុំ-សង្កាត់ អាណត្តិទី៥ ឱ្យបានគ្រប់ៗគ្នា ពិសេសបន្តឆ្ពោះទៅចូលរួមបោះឆ្នោតជ្រើសរើសតំណាងរាស្រ្តនៅឆ្នាំ២០២៣នាពេលខាងមុខផងដែរ៕
