ខេត្តកែប, នៅរសៀលថ្ងៃទី២៥ ខែសីហា ឆ្នាំ២០២២ ឯកឧត្តមបណ្ឌិត សោម ពិសិដ្ឋ អភិបាល នៃគណៈអភិបាលខេត្តកែប អញ្ជើញជាអធិបតី ក្នុងពិធីបិទកម្មវិធីផ្សព្វផ្សាយច្បាប់ស្តីពី ការត្រួតពិនិត្យផលិតផលថ្នាំជក់ និងវិធានការទប់ស្កាត់ការឆ្លងរីករាលដាលនៃជំងឺកូវីដ-១៩ ដែលរៀបចំឡើងនៅសាលាវិទ្យាល័យ ប៊ុន រ៉ានី ហ៊ុន សែន ចរិយាវង្ស ក្រុងកែប ។
លោក ណុប មណ្ឌល ប្រធានមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្តកែប ធ្វេីរបាយការណ៍ថា៖ ការរៀបចំពិធីផ្សព្វផ្សាយច្បាប់ ស្តីពី ការត្រួតពិនិត្យផលិតផលថ្នាំជក់ និងវិធានការទប់ស្កាត់ការឆ្លងរីករាលដាលនៃជំងឺកូវីដ-១៩ នៅថ្ងៃនេះ គឺជាការអនុវត្តនូវភារកិច្ចដ៏សំខាន់មួយក្នុងចំណោមភារកិច្ចសំខាន់ៗរបស់មន្ទីរដែលបានធ្វើកន្លងមក ឆ្លងតាមផែនការសកម្មភាពប្រចាំឆ្នាំរបស់មន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចខេត្ត គ្រោងនិងធ្វើសកម្មភាពផ្សព្វផ្សាយច្បាប់ក្នុងមួយឆ្នាំឲ្យបានចំនួន ០៨លើក គិតមកដល់ពេលនេះមន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានធ្វើការផ្សព្វផ្សាយច្បាប់សរុបបានចំនួន ០៦លើក ហើយក្នុងថ្ងៃនេះដោយមន្ទីរបានលើកយកច្បាប់ស្តីពី ការត្រួតពិនិត្យផលិតផលថ្នាំជក់និងវិធានការទប់ស្កាត់ការឆ្លងរាលដាលនៃជំងឺកូវីដ-១៩ ស្របតាមគោលនយោបាយឈ្នះៗ និងក្រោមម្លប់សន្តិភាព ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ថ្លែងក្នុងពិធីបិទវគ្គបណ្តុះបណ្តាលនាឱកាសនោះ ឯកឧត្តមបណ្ឌិត សោម ពិសិដ្ឋ មានប្រសាសន៍ថា៖ ពិធីផ្សព្វផ្សាយច្បាប់ ស្តីពីការត្រួតពិនិត្យផលិតផលថ្នាំជក់ និងវិធានការទប់ស្កាត់ការឆ្លងរីករាលដាលនៃជំងឺកូវីដ-១៩ នៅថ្ងៃនេះ បានបញ្ជ្រាបការយល់ដឹងដល់ប្អូនៗអំពីផលប៉ះពាល់ដែលបណ្តាលមកពីការប្រើប្រាស់ផលិតផលថ្នាំជក់ឬបារី ពិសេសការប្រើប្រាស់បារី អេឡិចត្រូនិច ថ្នាំជក់ ឬបារីអេឡិចត្រូនិច ប្រឈមនឹងគ្រោះថ្នាក់ធ្ងន់ធ្ងរដល់សុខភាពដូចជា៖ បង្កជំងឺមហារីក ជំងឺបេះដូង និងជំងឺសួត។ បច្ចុប្បន្នអង្គការសុខភាពពិភពលោក(WHO) ក៏ដូចជារាជរដ្ឋាភិបាលកម្ពុជា បានចេញសេចក្តីណែនាំស្តីពី ការទប់ស្កាត់ ការប្រើប្រាស់បារីអេឡិចត្រូនិច និងផលិតផលអេចឈ៍ធីភី (HTPs) តាមរយៈក្រសួងអប់រំ យុវជន និងកីឡា និងសេចក្តីជូនព័ត៌មានរបស់ក្រសួងសុខាភិបាល និងបានអំពាវនាវអោយមានចំណាត់ការប្រកបដោយប្រសិទ្ធភាព ក្នុងការប្រឆាំងការជក់បារី។
ឆ្លៀតក្នុងឳកាសនោះ ឯកឧត្តមបណ្ឌិត បានណែនាំដល់មន្ទីរអប់រំ យុវជន និងកីឡា មន្ទីរសុខាភិបាលខេត្ត ការិយាល័យចំណុះគ្រឹះស្ថានសិក្សាសាធារណៈ និងឯកជនគ្រប់កម្រិត និងអង្គភាពពាក់ព័ន្ធ ត្រូវអនុវត្តដូចខាងក្រោម៖
១- សូមធ្វើការផ្សព្វផ្សាយអោយបានទូលំទូលាយតាមគ្រប់រូបភាព អំពីផលប៉ះពាល់នៃការប្រើប្រាស់បារី អេឡិចត្រូនិច(E-Cigarette/Vape) និងផលិតផលអេចឈ៍ធីភី (HTPs)ដល់ បុគ្គលិក និងអ្នកសិក្សា។
២- សូមហាមឃាត់ការប្រើប្រាស់ ការចែកចាយ ការជួញដូរ ការផ្សព្វផ្សាយពាណិជ្ជកម្មគ្រប់រូបភាពអំពីបារីអេឡិចត្រូនិច (E-Cigarette/Vape) និងផលិតផលអេចឈ៍ធីភី (HTPs) ខាងក្នុង និងបរិវេណគ្រឹះស្ថានសិក្សា។
៣- សូមសហការជាមួយមាតាបិតា អាណាព្យាបាល បុគ្គលិកអប់រំ និងអ្នកសិក្សា ក្នុងការកំណត់មុខសញ្ញាទីតាំងចែកចាយ និងជួញដូរបារីអេឡិចត្រូនិច (E-Cigarette/Vape) និងផលិតផលអេចឈ៍ធីភី (HTPs) ដើម្បីរាយការណ៍ជូនអាជ្ញាធរមានសមត្ថកិច្ចចាត់វិធានការតាមផ្លូវច្បាប់។
៤- សូមលោកគ្រូ អ្នកគ្រូ និងក្មួយៗសិស្សានុសិស្សបន្តការចាក់វ៉ាក់សាំងដូសជំរុញ និងដូសបន្ថែមតាមការណែនាំរបស់ក្រសួងសុខាភិបាល។
៥- មន្ទីរអង្គភាពពាក់ព័ន្ធ បន្តជំរុញផ្សព្វផ្សាយអោយបានទូលំទូលាយដល់សិស្សានុសិស្ស និងប្រជាពលរដ្ឋអោយបានជ្រាប និងអនុវត្តតាមច្បាប់។
៦- មន្ទីរទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ចខេត្ត ត្រូវបន្តផ្សព្វផ្សាយច្បាប់ព្រះរាជក្រឹត្យ អនុក្រឹត្យសំខាន់ៗដល់អង្គភាពពាក់ព័ន្ធ និងប្រជាជនជាបន្តទៀត។
តាមរយៈវគ្គផ្សព្វផ្សាយច្បាប់ស្តីពី ការត្រួតពិនិត្យផលិតផលថ្នាំជក់ វិធានការទប់ស្កាត់ការឆ្លងរាលដាលនៃជំងឺកូវីដ-១៩ ឯកឧត្តមបណ្ឌិតសង្ឃឹមថា សិស្សានុសិស្សបានយល់ដឹងពីគោលបំណងនៃច្បាប់ ទោសប្បញ្ញតិ ការផាកពិន័យជាប្រាក់ និងផលប៉ះពាល់លើខ្លួនឯង និងបរិស្ថាន ដែលបណ្តាលមកពីការប្រើប្រាស់ផលិតផលថ្នាំជក់ និងបារីអេឡិចត្រូនិច និងវិធានការ ការពារជំងឺកូវីដ-១៩ តាមការណែនាំរបស់ក្រសួងសុខាភិបាល និងបានក្រើនរំលឹកដល់ក្មួយៗត្រូវគោរពច្បាប់ចរាចរណ៍អោយបានត្រឹមត្រូវ និងជៀសចាកឆ្ងាយពីគ្រឿងញៀន៕
