នៅព្រឹកថ្ងៃទី៣០ ខែសីហា ឆ្នាំ២០២២ នេះ វិទ្យាស្ថានជាតិស្ថិតិ នៃក្រសួងផែនការ សហការជាមួយរដ្ឋបាលខេត្តកែប រៀបចំសិក្ខាសាលាកសាងសមត្ថភាព ស្តីពី “ ការចងក្រងម៉េតាទិន្ន័យ និងការប្រើប្រាស់កម្មវិធីថ្នាលទិន្ន័យរាយការណ៍សូចនាករគោលដៅអភិវឌ្ឍន៍ប្រកបដោយចីរភាព “ ពិធីនេះប្រព្រឹត្តទៅក្រោមអធិបតីភាព ឯកឧត្តម វី ហៀង រដ្ឋលេខាធិការក្រសួងផែនការ តំណាងដ៏ខ្ពង់ខ្ពស់ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីនៃក្រសួងផែនការ និងឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប និងមានការអញ្ជើញចូលរួមពីសំណាក ឯកឧត្ដម លោកជំទាវ លោក លោកស្រី គណៈប្រតិភូ អមដំណេីរ ឯកឧត្ដម រដ្ឋលេខាធិការ មន្ត្រីរាជការ និងសិក្ខាកាមមកពីខេត្ត តាកែវ កំពត ព្រះសីហនុ កោះកុង សរុបចំនួន ៦០រូប។
មានមតិស្វាគមន៍ក្នុងអង្គសិក្ខាសាលានាឱកាសនោះ ឯកឧត្តមបណ្ឌិត សោម ពិសិដ្ឋ អភិបាលខេត្តកែប មានប្រសាសន៍ថា៖ ក្រោមការដឹកនាំដ៏ឈ្លាតវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើអោយប្រទេសជាតិមានសុខសន្តិភាព និងរីកចម្រើនលើគ្រប់វិស័យ ដោយមានការយកចិត្តទុកដាក់របស់ថ្នាក់ដឹកនាំខេត្ត និងការចូលរួមអនុវត្តតួនាទី ភារកិច្ចរបស់មន្ទីរ អង្គភាពជំនាញ អាជ្ញាធរគ្រប់លំដាប់ថ្នាក់ និងការចូលរួមចំណែកអភិវឌ្ឍន៍របស់វិស័យឯកជន រួមទាំងសក្តានុពលវិស័យទេសចរណ៍ធម្មជាតិជាច្រើនកន្លែង បានធ្វើអោយខេត្តកែប មានការរីកចម្រើនជាបន្តបន្ទាប់ ទាំង ហេដ្ឋារចនាសម័្ពន្ធ អាគារដ្ឋបាល ផ្លូវថ្នាល់ សំណង់ រមណីយដ្ឋាន រីស៊ត សណ្ឋាគារ ផ្ទះសំណាក់ ភោជនីយដ្ឋាន មានការកសាងរីកដុះដាលគួរអោយកត់សម្គាល់។ កត្តាទាំងនេះបានលើកស្ទួយវិស័យសេដ្ឋកិច្ច និងការអភិវឌ្ឍន៍ខេត្ត ដោយបានបង្កើតការងារ មុខរបរ និងបង្កើតប្រាក់ចំណូល ក្នុងការរួមចំណែកលើកកម្ពស់កម្រិតជីវភាពរបស់ប្រជាពលរដ្ឋ ស្របតាមយុទ្ធសាស្ត្ររបស់រាជរដ្ឋាភិបាល ក្នុងការកាត់បន្ថយភាពក្រីក្រជូនប្រជាពលរដ្ឋ។ ឯកឧត្តម បន្ថែមថា ផ្អែកលើទិន្ន័យ និងបច្ចេកទេសផ្សេងៗដែលបានអនុវត្តកន្លងមក មន្ទីរផែនការ បាននិងកំពុងដើរតួរយ៉ាងសំខាន់ ដែលមិនអាចខ្វះបាន ពិសេសការរៀបចំកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលខេត្ត ក្រុង ស្រុក ឃុំ សង្កាត់ ដោយបំផុសអោយមានការចូលរួមសហការជាមួយមន្ទីរ អង្គភាព ជំនាញជុំវិញខេត្ត និងវិស័យឯកជនផងដែរ ។ ឯកឧត្តម បន្តថា មន្ទីរផែនការខេត្ត បានអនុវត្ត តួនាទីភារកិច្ចជាមន្ត្រីស្ថិតិថ្នាក់ក្រោមជាតិ លើការងារជំរឿនប្រជាជន ជំរឿនកសិកម្ម ជំរឿនសេដ្ឋកិច្ច ដែល១០ឆ្នាំធ្វើម្តង និងធ្វើអង្កេតជំរឿនរាល់ចន្លោះ៥ឆ្នាំម្តង ក្នុងនោះដែរ ឯកឧត្តមបណ្ឌិត ក៏បានស្នើដល់ថ្នាក់ដឹកនាំវីទ្យាស្ថានស្ថិតិ និងថ្នាក់ដឹកនាំក្រសួងផែនការ ជួយពង្រឹងបច្ចេកទេស និងសម្របសម្រួលគណនាផលិតផលក្នុងស្រុកសរុបរបស់ខេត្ត អោយបានទៀងទាត់ និងទាន់ពេលវេលា។
លោកជំទាវ ហង់ លីណា ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយកវិទ្យាស្ថានជាតិស្ថិតិ មានប្រសាសន៍ថា៖ បច្ចុប្បន្ន វិទ្យាស្ថានជាតិស្ថិតិ បានអនុវត្តន៍គម្រោងគាំទ្របច្ចេកទេសដោយអង្គការ UNSD ស្តីពីការតាមដាន SDG ដែលគម្រោងនេះត្រូវបានបញ្ចប់នៅឆ្នាំ២០២២ ដោយផ្តោតលើកម្មវត្ថុសំខាន់ គឺការធ្វើអោយកាន់តែប្រសើរឡើងនូវការផ្សព្វផ្សាយទិន្ន័យប្រកបដោយលក្ខណៈបើកទូលាយ និងផ្តល់លទ្ធភាពទទួលបានទិន្ន័យសូចនាករ SDG ពីសំណាក់អ្នកប្រើប្រាស់ទូទៅកាន់តែទូលំទូលាយ។ តាមរយៈការអនុវត្តន៍គម្រោងនេះ វិទ្យាស្ថានជាតិស្ថិតិ ទទួលខុសត្រូវរៀបចំផែនការអនុវត្តន៍សម្រាប់តាមដានសូចនាករ SDG ព្រមទាំងផ្តល់ភាពងាយស្រួលដល់ការផ្លាស់ប្តូរទិន្ន័យ និងគាំទ្រដោយពេញលេញលើការប្រើប្រាស់វិធីសាស្ត្រផ្លាស់ប្តូរទិន្ន័យ និងម៉េតាទិន្ន័យសូចនាករ SDG/CSDG ប្រកបដោយលក្ខណៈស្តង់ដានៅក្នុងប្រព័ន្ធស្ថិតិជាតិ។
មានប្រសាសន៍បើកអង្គសិក្ខាសាលានាឱកាសនោះ ឯកឧត្តម វី ហៀង រដ្ឋលេខាធិការក្រសួងផែនការ បានលេីកឡេីងថា៖ សិក្ខាសាលានាថ្ងៃនេះ មានគោលបំណងដើម្បីសម្រេចគោលដៅរួម នៃផែនការយុទ្ធសាស្ត្រអភិវឌ្ឍន៍ជាតិកម្ពុជា(NSDP) និងគោលដៅអភិវឌ្ឍន៍ប្រកបដោយចីរភាព(SDG) ក្នុងក្របខណ្ឌគតិយុត្តិ និងគោលនយោបាយអភិវឌ្ឍន៍ស្ថិតិ ។
ជាក់ស្តែងនាពេលថ្មីៗនេះ យើងបានធ្វើវិសោធនកម្មច្បាប់ ស្តីពី ស្ថិតិថ្មី (ឆ្នាំ២០១៥) ការរៀបចំយុទ្ធសាស្ត្រជាតិសម្រាប់អភិវឌ្ឍន៍ស្ថិតិឆ្នាំ២០១៨-២០២៣ (NSDS 2018-2023)ការបង្កើតគណៈកម្មាធិការសម្របសម្រួលស្ថិតិ និងការបង្កើតក្រុមការងារទិន្ន័យសម្រាប់ការអភិវឌ្ឍន៍នៃក្រុមការងារបច្ចេកទេសផែនការ និងការកាត់បន្ថយភាពក្រីក្រជាដើម។
ឯកឧត្តមបន្តថា៖ ផ្អែកតាមការអនុវត្តគោលដៅអភិវឌ្ឍន៍ប្រកបដោយចីរភាពសាកល(SDG)ដែលមានចំនួន ១៧ គោលដៅ ១៦៩ចំណុច និង ២៣២សូចនាករ តាមរយៈក្របខ័ណ្ឌ SDG ជាសកលនេះ ក្រសួងផែនការត្រូវបានប្រគល់ភារកិច្ច ដោយប្រមុខរាជរដ្ឋាភិបាលកម្ពុជា មានតួនាទីស្នូលដឹកនាំសម្របសម្រួលនៅក្នុងដំណើរការធ្វើមូលដ្ឋានីយកម្ម SDG ទៅក្នុងបរិបទនៃកម្ពុជា និងដើម្បីអោយស្របទៅតាមកម្មវិធីនយោបាយសំខាន់ៗដែលបានកំណត់នៅក្នុងយុទ្ធសាស្រ្តចតុកោណរបស់រាជរដ្ឋាភិបាលកម្ពុជា ។ បច្ចុប្បន្នសម្រាប់គោលដៅអភិវឌ្ឍន៍ប្រកបដោយចីរភាពកម្ពុជា( CSDG) គឺមានចំនួន ១៨គោលដៅ ក្នុងនោះដោយបន្ថែមគោលដៅ ស្តីពីការបញ្ចប់ផលប៉ះពាល់ដោយសារមីន ចំនួន ៨៨ចំណុច និង១៤៨សូចនាករ សម្រាប់គាំទ្រគោលដៅទាំង១៨នេះ។
តាមរយៈសិក្ខាសាលានេះ ឯកឧត្តម ជឿជាក់យ៉ាងមុតមាំថា សិក្ខាកាមទាំងអស់ និងទទួលបានចំណេះដឹង បទពិសោធន៍ថ្មីៗ និងការយល់ដឹងកាន់តែទូលំទូលាយអំពីចរិកលក្ខណៈរបស់សូចនាករ និងភាពសំខាន់របស់ម៉េតាទិន្ន័យ ជាពិសេស សមាសធាតុសំខាន់នៅក្នុងទម្រង់បំពេញព័ត៌មានម៉េតាទិន្ន័យ សម្រាប់អ្នកប្រើប្រាស់ទូទៅ៕
