ថ្ងៃទី១៨ ខែមីនា ឆ្នាំ២០២១ ឯកឧត្ដម អ៊ូច ភា អភិបាល នៃគណៈអភិបាលខេត្ត អមដំណើដោយ លោក ខាន់ សុខា អភិបាលរងខេត្ត និងមន្រ្តីពាក់ព័ន្ធ បានអញ្ជើញចុះត្រួតពិនិត្យស្ថានភាពទូទៅ របស់ពលរដ្ឋ ចេញ ឬចូល ព្រំប្រទល់ ស្រុកព្រៃកប្បាស ស្រុកបាទី របស់ខេត្តតាកែវ ដែលមានព្រំប្រទល់ជាប់ ស្រុកកណ្ដាលស្ទឹង ស្រុកកោះធំ និងស្រុកស្អាង ដើម្បីចូលរួមបង្ការ ទប់ស្កាត់ការឆ្លងរីករាលដាល នៃជំងឺជំងឺកូវីដ-១៩ កុំឱ្យកើតមានឡើងចូលក្នុងសហគមន៍ ជាពិសេសព្រឹត្តិការណ៍ ២០កុម្ភៈ កុំឱ្យបន្តកើនឡើង នៅសហគមន៍បន្តទៀត ។
មានប្រសាសន៍ណែនាំដល់កងកម្លាំងឈរជើងប្រចាំការនៅព្រំប្រទល់នាឱកាសនោះដែរ ឯកឧត្តម អ៊ូច ភា អភិបាលខេត្ត បានថ្លែងថា ការចុះពិនិត្យនេះ គឺក្នុងគោលបំណងបង្កើនការរឹតបន្តឹងលើការត្រួតពិនិត្យ និងការគ្រប់គ្រងទីតាំងក្នុងគោលដៅនិមួយៗធានាបាននូវប្រសិទ្ធភាពនៃការចូលរួមប្រយុទ្ធប្រឆាំងបង្ការទប់ស្កាត់ជាមួយរាជរដ្ឋាភិបាល និងអនុវត្តនូវវិធានការ និងសេចក្ដីណែនាំរបស់ក្រសួងសុខាភិបាល។
ក្នុងឱកាសនេះ ឯកឧត្តម អភិបាលខេត្ត ក៍សូមសំដែងការកោតសរសើរ និងលើកទឹកចិត្តចំពោះ គណៈកម្មាការប្រយុទ្ធប្រឆាំងជំងឺកូវីដ-១៩ ខេត្ត និងស្រុក ព្រមទាំងមន្ត្រី និងកងកម្លាំង ជាពិសេសលោកគ្រូពេទ្យ ដែលជាកំលាំងជួរមុខ ក្នុងគោលដៅទាំងអស់ ដែលបានប្រឹងប្រែងអស់ពីកម្លាំងកាយចិត្តក្នុងបេសកកម្មនេះ។
ក្នុងឱកាសចុះត្រួតពិនិត្យនុះដែរ ឯកឧត្តមអភិបាលខេត្ត ក៏បានធ្វើការឧបត្ថម្ភនូវថវិកាមួយចំនួន ដល់អាជ្ញាធរ និងកងកម្លាំងឈរជើងប្រចាំការនៅតាមគោលដៅសំខាន់ៗ នីមួយៗផងដែរ ៕
