ព្រឹកថ្ងៃទី១៨ ខែតុលា ឆ្នាំ២០២២ ឯកឧត្តមបណ្ឌិត សោម ពិសិដ្ឋ ប្រធានគណៈកម្មាធិការសាខាកាកបាទក្រហមកម្ពុជាខេត្តកែប បានអញ្ចេីញដឹកនាំកិច្ចប្រជុំ ជាមួយ លោក លោកស្រី សមាជិក សមាជិកា អនុសាខាក្រុងស្រុក និងមន្ត្រីប្រតិបត្តិសាខា នៃគណៈកម្មាធិការសាខាកាកបាទក្រហមកម្ពុជាខេត្ត ដេីម្បីពិនិត្យ និងឆ្លងសេចក្តីព្រាងរបាយការណ៍សកម្មភាពការងាររយៈពេល ៩ខែដេីមឆ្នាំ និងលេីកទិសដៅអនុវត្តបន្ត, ពិនិត្យ និងឆ្លងសេចក្តីព្រាងរបាយការណ៍ហិរញ្ញវត្ថុរយៈពេល ៩ខែដេីមឆ្នាំ, ពិនិត្យ ពិភាក្សាលើសេចក្តីព្រាងកែសម្រួលសមាសភាពគណ:កិត្តិយស និងគណ:កម្មាធិការអនុសាខាកាកបាទក្រហមកម្ពុជា ក្រុង ស្រុកទាំងពីរ និងបញ្ហាផ្សេងៗ។
លោកស្រី អ៊ូ សុគន្ធី លេខាធិការគណៈកម្មាធិការសាខា បានអានរបាយការណ៍លទ្ធផលការងាររយៈពេល៩ខែដេីម ឆ្នាំ២០២២ របស់ សាខាកាកបាទក្រហមកម្ពុជាខេត្តកែប ដោយបានបំពេញភារកិច្ច និងធ្វើសកម្មភាពការងារតាមរយៈវិស័យអាទិភាពចំនួន៤៖ ១-ការគ្រប់គ្រងគ្រោះមហន្តរាយ, ២- ការថែទាំសុខភាពក្នុងសហគមន៍, ៣- ការលើកកម្ពស់គោលការណ៍គ្រឹះក្នុងតម្លៃមនុស្សធម៌ និង៤- ការអភិវឌ្ឍន៍ស្ថាប័ន។
បន្ទាប់ពីលោក កែវ ហុង ហិរញ្ញឹកគណៈកម្មាធិការសាខា អានរបាយការណ៍ ហិរញ្ញវត្ថុចំណូល ចំណាយរួចមក ឯកបណ្ឌិត សោម ពិសិដ្ឋ ប្រធានគណៈកម្មាធិការសាខា បានពាំនាំនូវប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនប្រធានកាកបាទ
ក្រហមកម្ពុជា ដែលបានកោតសរសើ និងថ្លែងអំណរគុណដល់គណៈកម្មាធិការសាខា ក្រុមប្រតិបត្តិសាខា អនុសាខាទាំងអស់ ដែលបានយកចិត្តទុកដាក់ខិតខំបំពេញការងារមនុស្សធម៌ប្រកបដោយសកម្មភាពរស់រវើកមានការវិវត្តន៍ពីមួយជំហ៊ានទៅមួយជំហ៊ាន ធ្វើឲ្យសាខាទទួលបាននូវជោគជ័យគួរឲ្យកត់សំគាល់។ នេះសរបញ្ជាក់ឲ្យឃើញនូវស្មារតី និងការទទួលខុសត្រូវចំពោះសកម្មភាពដែលបានអនុវត្តន៍កន្លងមក ស្របទៅនឹងយុទ្ធសាស្ត្រទស្សនៈវិស័យ និង បេសកកម្ម សកម្មភាពការងារក្នុងវិស័យមនុស្សធម៌ រួមចំណែកកាត់បន្ថយភាពក្រីក្រជួយដល់ជនងាយរងគ្រោះ។ សមាជិក សមាជិកា នៃអង្គប្រជុំ បានលេីកដៃឯកភាពទាំងស្រុងនូវរបាយការណ៍លទ្ធផលការងាររយ:ពេល៩ខែដេីមឆ្នាំ២០២២ និងលេីកទិសដៅអនុវត្តបន្ត, របាយការណ៍ហិរញ្ញវត្ថុរយៈពេល ៩ខែដេីមឆ្នាំ និងការកែសម្រួលសមាសភាពគណ:កិត្តិយស និងគណ:កម្មាធិការអនុសាខាកាកបាទក្រហមកម្ពុជា ក្រុង ស្រុកទាំងពីរ។
មានប្រសាសន៍បូកសរុបកិច្ចប្រជុំពេលនោះ ឯកឧត្តមបណ្ឌិត ប្រធានគណៈកម្មាធិការសាខា បានសំណូមពរដល់ នាយកសាខា សមាជិកសាខា និងអនុសាខា ក្រុង ស្រុក ត្រូវពិនិត្យកែសម្រួលនៅចំណុចខ្វះខាត ក្នុងរបាយកាណ៍៩ខែ និងបន្តចុះពិនិត្យជាក់ស្តែងពីស្ថានភាពរបស់ប្រជាពលរដ្ឋដែលងាយរងគ្រោះ និងគ្រួសារដែលងាយរងគ្រោះដោយសារគ្រោះមហន្តរាយផ្សេងៗ ដើម្បីឆ្លើយតបឲ្យបានទាន់ពេលវេលា និងពង្រឹងបន្ថែមលើការងាររដ្ឋបាល និងហិរញ្ញវត្ថុ ការងារស្វែងរកមូលនិធិត្រូវជួយ កៀងគរបន្ថែម និយាយជារួមដោយផ្តោតសំខាន់ទៅលើការរៀបចំ និងការប្រព្រឹត្តទៅនៃការងារស្នូល របស់សាខា និងអនុសាខាទាំងអស់ដែលបានអនុវត្តតាមវិស័យស្នូលទាំង៤៕
